AMM 2026: СТРАТЕГИЯЛЫҚ ШЕШІМДЕР МЕН ИННОВАЦИЯЛАР ЖАҺАНДЫҚ ТАУ-КЕН МЕТАЛЛУРГИЯ КЕШЕНІНІҢ ДАМУ БАҒЫТЫН АЙҚЫНДАЙТЫН ХАЛЫҚАРАЛЫҚ АЛАҢ

2026 ЖЫЛҒЫ 11–12 МАУСЫМДА АСТАНАДА ОРТАЛЫҚ АЗИЯДАҒЫ САЛАНЫҢ НЕГІЗГІ ІС-ШАРАЛАРЫНЫҢ БІРІ САНАЛАТЫН 16-ШЫ ХАЛЫҚАРАЛЫҚ ТАУ-КЕН МЕТАЛЛУРГИЯ ASTANA MINING & METALLURGY 2026 КОНГРЕСІ ӨТЕДІ.

Іс-шара тау-кен металлургия кешенінің мемлекеттік сектор өкілдерін, халықаралық бизнесті, инвесторларды, технологиялық көшбасшыларды және кәсіби қауымдастықты біріктіреді.

Көптеген жылдар бойы AMM ТМК-ны дамытудың стратегиялық мәселелерін талқылауға, халықаралық ынтымақтастықты нығайтуға, инвестициялар тартуға және озық технологиялық шешімдерді енгізуге арналған беделді кәсіби алаң болып келеді. 2026 жылы конгресс мемлекеттер, өнеркәсіп және инновациялық компаниялар арасындағы жаһандық диалогты қалыптастыру миссиясын жалғастырып, тұрақты даму, декарбонизация, цифрлық трансформация және саланы технологиялық жаңғырту мәселелеріне ерекше назар аударады.

 

Көрменің 2026 жылғы экспозициясы

AMM 2026 көрме экспозициясы Австралия, Германия, Италия, Қазақстан, Канада, Қытай, Ресей, Сауд Арабиясы, АҚШ, Өзбекстан, Финляндия, Франция, Чехия, Швеция және Эстонияны қоса алғанда, 15 елден келген 70-тен астам компанияны біріктіреді.

Экспозицияда тау-кен өндіру және металлургия өнеркәсібіне арналған шешімдер мен технологиялардың кең ауқымы ұсынылады. Келушілер ашық және жерасты кен жұмыстарын жүргізуге арналған заманауи тау-кен жабдықтарымен, бұрғылау және жару техникаларымен, ауыр техникамен, шикізатты байыту және өңдеу саласындағы шешімдермен, геологиялық барлау және геотехнологиялармен, инжиниринг және EPC қызметтерімен, сондай-ақ конвейерлік жүйелермен және энергетикалық жабдықтармен таныса алады. Саланы цифрландыру мәселелеріне ерекше назар аударылады. Алаңда ТМК үшін бағдарламалық қамтамасыз ету шешімдері, автоматтандыру жүйелері, өнеркәсіптік қауіпсіздік технологиялары, экологиялық және сүзгілеу жүйелері, зертханалық жабдықтар, жағармай материалдары және өндірістік процестердің тиімділігін арттыруға арналған өзге де заманауи әзірлемелер ұсынылады.

Биылғы жылы AMM алаңында Сауд Арабиясы, АҚШ және Швецияның ұлттық топтары таныстырылады. Бұл халықаралық өнеркәсіптік әріптестіктің кеңейіп келе жатқанын және мемлекеттер арасындағы ынтымақтастықтың жаңа бағыттарының дамуын көрсетеді. Көрме қатысушылары қатарында әлемге танымал брендтермен бірге AMM көрмесіне алғаш рет қатысып отырған компаниялар да бар. 2026 жылғы дебютанттардың қатарында ABP Engineering, Cummins, David Brown Santasalo, FläktGroup, Hartree Partners, Italimpianti Orafi & Tera Automation, Seequent, XCMG Xugong KZ және тау-кен металлургия кешеніне арналған өнеркәсіптік жабдықтар, автоматтандыру, инжиниринг, цифрландыру және экологиялық технологиялар саласындағы заманауи шешімдерді ұсынатын басқа да халықаралық компаниялар бар.

Komatsu және XCMG секілді әлемдік жетекші техника және жабдық өндірушілерінің қатысуы ерекше назар аудартады. Олар тау-кен металлургия кәсіпорындарына арналған заманауи технологиялық шешімдерін ұсынады.

 

AMM 2026 Конгресі

Конгресс халықаралық салалық диалогтың ауқымды алаңына айналады. Екі күн ішінде конгресс алаңында Қазақстан, Бельгия, Канада, Қытай, БАӘ, Сауд Арабиясы, АҚШ, Франция, Швеция және Оңтүстік Кореядан келген шамамен 190 халықаралық спикердің қатысуымен 21 салалық сессия және 3 форум өтеді. Бірінші күннің басты оқиғасы саланың жаһандық бәсекеге қабілеттілігі, маңызды минералдардың жаңа жеткізу тізбектерін қалыптастыру және жасанды интеллекттің индустрия дамуына әсері мәселелеріне арналған «Жер қойнауынан – интеллект шыңдарына: ТМК болашағы үшін жаһандық әріптестік» атты пленарлық отырыс болады.

Отырысқа мемлекеттік құрылымдардың, халықаралық ұйымдардың және жетекші салалық бірлестіктердің жоғары лауазымды өкілдері қатысады. Расталған VIP-қонақтар қатарында:

Бандар ибн Ибрахим Әл-Хурайф – Сауд Арабиясы Корольдігінің Өнеркәсіп және минералдық ресурстар министрі

Халид Әл-Мудайфер – Сауд Арабиясы Корольдігінің Өнеркәсіп және минералдық ресурстар вице-министрі

Серджио Гор – АҚШ Президентінің Оңтүстік және Орталық Азия жөніндегі арнайы өкілі

Дэвид Л. Фогель – АҚШ Сауда министрінің көмекшісі, АҚШ және шетелдік елдер бойынша Коммерциялық қызметтің (Global Markets) бас директоры

Валер Мутарлье – Еуропалық өнеркәсіп және декарбонизация мәселелері жөніндегі бас директордың орынбасары, ішкі нарық, өнеркәсіп, кәсіпкерлік және шағын және орта бизнес жөніндегі бас директорат (DG GROW), Еуропалық комиссия

Диана Янсе – Швеция Сыртқы істер министрлігінің мемлекеттік хатшысы

Массимо Гаспарон – Еуропалық шикізат материалдары альянсының (European Raw Materials Alliance, ERMA) директоры

AMM 2026 іскерлік бағдарламасы халықаралық ынтымақтастық пен инвестициялық ахуалдан бастап жасанды интеллектке, критикалық минералдарға, логистикаға, геологиялық барлауға және шикізатты терең өңдеуге дейінгі стратегиялық маңызы бар тақырыптардың кең ауқымын қамтиды.

11 маусым: жаһандық әріптестік, инвестициялар және тау-кен металлургия саласының трансформациясы

Бірінші күннің тақырыптық сессиялары аясында ТМК дамуының негізгі бағыттары қарастырылады: инвестициялық ахуал және реттеуші орта, жоғары құбылмалылық жағдайындағы металл саудасы мен баға тәуекелдерін басқару, саланы салықтық реттеу, сондай-ақ геологиялық барлауды трансформациялау және критикалық минералдар саласындағы инвестициялық жобаларды іске асыру.

Халықаралық ынтымақтастық мәселелеріне ерекше назар аударылады. Халықаралық әріптестікті нығайту аясында АҚШ және Еуропалық Одақпен үкіметтік және B2B кездесулер өтеді. Сонымен қатар, АҚШ пен Канада критикалық минералдар мен тау-кен өндіру әлеуетіне арналған жеке воркшоптар ұйымдастырады. Бағдарлама сондай-ақ Орталық Азияның жаһандық жеткізу тізбектеріне көлік және логистикалық интеграциясы, сындарлы минералдар нарығын дамыту және старательдік өндіру мәселелері бойынша пікірталастарды қамтиды.

12 маусым: болашақ технологиялары, цифрландыру және ТМК-ның тұрақты дамуы

Конгрестің екінші күні саланың технологиялық трансформациясына және өндірістік процестерге инновацияларды енгізуге арналады.

Күннің басты талқылауы «Тау-кен өндіру және өңдеу саласындағы жасанды интеллект: практикалық кейстер және енгізу сын-қатерлері» сессиясы болады. Онда халықаралық сарапшылар жасанды интеллектіні, роботтандыруды және өндірісті басқарудың цифрлық жүйелерін ТМК-да қолданудың нақты мысалдарын ұсынады.

Сондай-ақ назарда – жоғары қайта өңдеу деңгейіне көшу және қосылған құнды арттыру мәселелері, сондай-ақ өндірістің тиімділігі мен экологиялық тұрақтылығын арттыруға бағытталған минералдық шикізатты өңдеудің заманауи шешімдері болады.

Бағдарлама аясында Қазақстан Алтын өндірушілер форумы, Көмір өңдірушілер форумы, Қазақстан зергерлерінің конгресі, «ТМК кешенінің медиадағы бейнесі: күшті бедел кімге тиімді?» атты PR-кездесу, бизнестің жаңа саяси архитектура жағдайындағы жұмысына арналған GR-фасилитациялық сессия, B2B және B2G кездесулері, сондай-ақ Qarmet кәсіпорнына өндірістік экскурсия өтеді.

AMM 2026 аясындағы маңызды оқиғалардың бірі C5+1 форматындағы іс-шараның өтуі болмақ. Бұл Орталық Азия елдері мен Америка Құрама Штаттары арасындағы жоғары деңгейдегі диалог алаңы болып табылады және Қазақстанның тау-кен металлургия саласындағы халықаралық диалогтың негізгі орталығы әрі жаһандық шикізат нарығының жаңа архитектурасын қалыптастырудағы стратегиялық серіктес ретіндегі рөлін тағы да айқындай түседі.

 

Ұлттық «Алтын Гефест» байқауы

11 маусым күні тау-кен металлургия саласының үздік мамандары 15 номинация бойынша беделді марапаттарға ие болады. Байқау номинацияларының ауқымы кең: геология, металлургия және тау-кен ісі салаларындағы «Жыл кәсіпқойынан» бастап, үздік әлеуметтік жоба, өнеркәсіптік қауіпсіздік жетістіктері және цифрлық инновациялар үшін берілетін марапаттарға дейін қамтиды. Номинациялардың мұндай алуан түрлілігі кәсіби жетістіктерді бағалаудың кешенді тәсілін, сондай-ақ қазіргі өндірістік сектордағы инновациялар мен әлеуметтік жауапкершіліктің маңыздылығын көрсетеді. Жұмысшы мамандықтар жылы мен «Алтын Гефест» байқауы Қазақстанның жаңғыртуға, инновацияларды енгізуге және адами капиталды дамытуға деген ұмтылысын айқындайды. Байқаудың дәстүрлі бас серіктесі – Eurasian Resources Group (ERG).

 

Ресми қолдау

Іс-шараны Қазақстандық ITECA көрме компаниясы және оның халықаралық серіктесі – ICA Events компаниялар тобы ұйымдастырады.

Мемлекеттік серіктес: ҚР Өнеркәсіп және құрылыс министрлігі.

Іс-шараға Астана қаласының әкімдігі, Тау-кен өндіруші және тау-кен металлургия кәсіпорындарының республикалық қауымдастығы (ТМКҚ), Бағалы металдар өндірушілер республикалық қауымдастығы, «Атамекен» ҚР Ұлттық кәсіпкерлер палатасы, Ұлттық геологиялық қызмет, Kazakh Invest және Visit Nursultan ресми қолдау көрсетеді.

Бас серіктес: «Qarmet» АҚ

Алтын серіктестер: Eurasian Resources Group (ERG), KAZ Minerals, Қазақмыс, Kazzinc.

Күміс серіктестер: Komatsu Central Asia, Aktobe Copper Company.

Қола серіктестер: Turan Industrial & Redpath, Dassault Systemes, Solidcore Resources, Axellect.

 

Толық ақпаратты www.amm.kz сайтынан алуға болады.